2022 оны Гадаад хэргийн сайдын өргөмжлөлийг ШУА-ийн Олон улс судлалын хүрээлэнгийн Эрдэм шинжилгээний тэргүүлэх ажилтан, доктор Б.Сэржавт  гардуулжээ.

Тэрбээр япон судлаачийн хувьд амьдралынхаа 40 жилийг эрдэм шинжилгээ, судалгааны талаас Япон, Монголын харилцааг хөгжүүлэхэд хувь нэмрээ оруулж ирсэн гавьяа зүтгэлийг үнэлэн энэхүү өргөмжлөлийг олгожээ.
Энэ сарын 4-нд болсон ёслолын үеэр Элчин сайд Х.Кобаяши хэлсэн үгэндээ, “Эрхэм хүндэт Б.Сэржав доктор ялангуяа хүний хөгжил, жижиг дунд үйлдвэрт үзүүлэх дэмжлэг, японы ногоон хөгжил зэрэг сэдвээр судалгааны ажлаа хийхийн хамт залуу судлаачдыг бэлтгэхэд ч хүчин чармайлт гаргаж байна. Мөн дипломат харилцаа тогтоосны 50 жилийн ой тохиож буй энэ жил “Япон, Монголын харилцааны түүхэн товчоо” эмхэтгэлийг хариуцан хэвлүүлсэн. Энэхүү харилцааны түүхэн товчоо нь хойч үедээ үлдээх маш үнэ цэнтэй бүтээл юм” хэмээн тэргүүлэх ажилтан, доктор Б.Сэржавын гаргаж ирсэн гавьяа зүтгэлийг онцлон тэмдэглэж, цаашдын ажил үйлсэд нь амжилт хүсэн ерөөв.