Сүхбаатар аймгийн Эрдэнэцагаан сумын Бадрах багийн “Хөшөөт” гэдэг газар өчигдөр 12.15 цагт хээрийн түймэр гарсныг аймгийн ОБГ, Онгон сумын Хилийн 0184, 0146 ангийнхан, Эрдэнэцагаан, Дарьганга сумын ЗДТГ-ын ажилтнууд цурамд оруулан, 23.56 цагт бүрэн унтраажээ.

Эрдэнэцагаан сумын Хадын булаг багийн “Өгөөмөр” гэдэг хээрийн түймэр гарсныг 20.10 цагт бүрэн унтраажээ. Түймэрт урьдчилсан байдлаар 4500га талбай шатсан байна.

Түүнчлэн, Архангай аймгийн Цэнхэр сумын Цэнхэр багийн “Ширдгийн гол” гэдэг газар мөн өдөр ойн түймэр гарсныг аймгийн ОБГ-ын алба хаагчид, орон нутгийн иргэд 19.50 цагт цурамд оруулаад байгаа аж.

Мөн Өвөрхангай аймгийн Бат-Өлзий сумын Цагаан-Азарга багийн Ханбаян-Уул гэдэг газар өчигдөр гарсан ойн түймрийг ОБХ-ийн алба хаагчид, Бат-Өлзий сумаас Ойн ангийн даргаар ахлуулсан иргэд ажиллаж, өглөөний 8.05 цагт цурамд оруулан, бүрэн унтраахаар ажиллаж байгааг ОБЕГ мэдээллээ.

Улсын хэмжээнд одоогоор Архангай, Баян-Өлгий, Булган, Дархан-Уул, Дорнод, Хэнтий, Сүхбаатар, Сэлэнгэ, Өвөрхангай, Төв, Ховд, Хөвсгөл, Увс, Завхан, Говь-Алтай зэрэг 15 аймаг, нийслэлийн 4 дүүрэгт 136 удаагийн ой, хээрийн гал түймэр бүртгэгдсэн аж. Түймрийн дуудлагын тоог өнгөрсөн оны мөн үеийнхтэй харьцуулахад 78.8 хувиар нэмэгдэж, дээрх түймэрт урьдчилсан байдлаар ойн 10044 га, хээрийн 1,118,109 га, нийт 1,128,154 га талбай өртжээ.